Turqia prezantoi sot raketën e saj të parë balistike hipersonike, Tayfun Block-4, në ditën e parë të panairit ndërkombëtar të industrisë së mbrojtjes IDEF 2025, që po zhvillohet në Stamboll.

E zhvilluar nga kompania turke e mbrojtjes Roketsan, Tayfun Block-4 peshon 2,300 kilogramë, ka një gjatësi prej 6.5 metrash dhe ka një rreze veprimi prej 800 kilometrash. Raketa u vlerësua për shpejtësinë e lartë dhe manovrueshmërinë e avancuar.

Raketa balistike Tayfun Block-4 është versioni hipersonik i raketës Tayfun – raketa kombëtare me rrezen më të gjatë që është prodhuar ndonjëherë në Turqi.

“Tayfun Block-4 arrin rreze të gjata, duke vendosur një rekord tjetër për industrinë turke të mbrojtjes. Me një peshë mbi 7 tonë, ky version i ri i Tayfun, me kokë luftarake shumëqëllimore, do të jetë në gjendje të shkatërrojë objektiva strategjikë si sistemet e mbrojtjes ajrore, qendrat e komandës dhe kontrollit, hangarët ushtarakë dhe objekte kritike ushtarake nga distanca të mëdha“, thuhet në deklaratën e Roketsan.

Në edicionin e saj të 17-të, IDEF është një nga ekspozitat kryesore të industrisë së mbrojtjes në Turqi dhe këtë vit po tërheq një pjesëmarrje të gjerë ndërkombëtare.

Ngjarja gjashtë-ditore, e cila nisi të martën, përfshin pjesëmarrjen e më shumë se 900 kompanive turke dhe 400 kompanive të huaja, nga gjithsej 44 shtete. Kompani dhe delegacione nga vende si Kina, Afrika e Jugut, Mbretëria e Bashkuar, Katari, Arabia Saudite, Azerbajxhani dhe Pakistani po prezantojnë teknologji të avancuara në fushat e mbrojtjes, aviacionit dhe hapësirës.

Përveç Tayfun Block-4, gjiganti i industrisë së mbrojtjes Roketsan prezantoi edhe pesë sisteme të reja të avancuara në panair.

“Sot, kompania jonë – një markë globale në teknologjitë e raketave, raketave balistike dhe municioneve – vazhdon të udhëheqë zhvillimet teknologjike përmes kërkimeve dhe zhvillimeve (R&D), për të qenë forca goditëse dhe penguese e Forcave të Armatosura Turke dhe për të ofruar forcë strategjike dhe ekonomike për vendin tonë përmes eksporteve në shumë rajone të botës – nga Amerika në Evropë, nga Azia në Lindjen e Mesme. Në IDEF morëm pjesë me mbi 60 sisteme mbrojtëse që kanë provuar suksesin në terren, dallohen nga konkurrentët për nga performanca, dhe ndodhen në inventarët e shumë ushtrive moderne, veçanërisht të Forcave të Armatosura Turke. Gjithashtu po prezantojmë gjashtë produkte të reja në IDEF, duke treguar edhe një herë përparimin tonë në teknologjinë e mbrojtjes”, tha kreu ekzekutiv i Roketsan, Murat İkinci.

1.Raketa Atmaca me kapsulën Akata – Ajo është versioni i lëshuar nga nëndetëset i raketës kundër-anijeve Atmaca, e cila aktualisht ndodhet në inventarin e Forcave të Armatosura Turke, me një rreze veprimi prej 250 kilometrash.

E pajisur me teknologjinë më të avancuar, Akata do të forcojë mbrojtjen e Turqisë, me një rreze mbi 250 kilometra dhe një kokë luftarake shpërthyese me fragmente.

2.Raketa ajër-ajër Gökbora – Raketa me rreze përtej shikimit vizual, ka një rreze veprimi rreth 185 kilometra dhe do të përdoret kundër objektivave armike në platforma ajrore të pilotuara dhe të papilotuara.

3.Municioni qarkullues shumëqëllimor me shpejtësi të lartë, Eren – Eren mund të përdoret kundër njësive ajrore me shpejtësi të ulët, objektivave tokësore të blinduara dhe të pa-blinduara, si dhe kundër personelit armik. Ky municion mund të lëshohet nga dronët e armatosur, helikopterët, automjetet tokësore, sistemet tokësore dhe platformat detare, duke përmbushur një nevojë të rëndësishme në fushë falë aftësisë superiore të drejtimit, qëndrueshmërisë së gjatë dhe rrezes mbi 100 kilometra.

4.Sistemi i raketave balistike të lëshuara nga ajri, 300 Er – Ky sistem raketash mund të integrohet në avionë luftarakë dhe dronë të armatosur, me një rreze veprimi mbi 500 kilometra, në varësi të lartësisë dhe shpejtësisë së lëshimit. Ai mund të godasë shpejt objektiva strategjikë pa qenë nevoja që platforma lëshuese të hyjë në zonën e rrezikut të mbrojtjes ajrore armike.

5.Mjeti për lëshimin e satelitëve Simsek-2 – Kjo ka kapacitetin për të vendosur satelitë me peshë deri në 1,500 kilogramë në orbitë diellore sinkrone në një lartësi mbi 700 kilometra. Roketsan tha se planifikon të kryejë testin e parë të lëshimit të mjetit Simsek-1 në vitin 2027.