Rusia ka lëshuar më shumë se 300 dronë dhe mbi 30 raketa drejt qyteteve të ndryshme në Ukrainë, duke vrarë të paktën një person dhe duke plagosur disa të tjerë, njoftoi presidenti ukrainas Volodymyr Zelensky.

“Operacionet e shpëtimit janë duke u zhvilluar pas sulmit: rajonet Donetsk, Kirovohrad, Dnipro, Sumy, Kherson, Volyn, Zaporizhzhia, Mykolaiv, Odesa dhe Zhytomyr u prekën”, tha Zelensky.

Qyteti portual i Detit të Zi, Odesa, u qëllua nga 20 dronë dhe një raketë, njoftoi kryetari i bashkisë së qytetit Hennadii Trukhanov.

Sulmi shkaktoi një zjarr në një bllok apartamentesh, shkruan euronews, transmeton KFVA.

Pesë persona u shpëtuan nga apartamentet e tyre që po digjeshin, përfshirë një grua që vdiq pasi u shpëtua.

Të paktën gjashtë persona të tjerë, përfshirë një fëmijë, u lënduan.

Ndërkohë, në Sumy, infrastruktura kritike u dëmtua dhe mijëra familje mbetën pa energji elektrike.

Rusia gjithashtu nisi një breshëri dronësh në Pavlohrad, duke dëmtuar infrastrukturën kritike dhe një ndërtesë banimi.

Sipas kreut të administratës ushtarake rajonale të Dnipros, ky ishte sulmi më i madh në qytet që nga fillimi i agresionit rus.

Presidenti ukrainas falënderoi udhëheqësit ndërkombëtarë “të cilët e kuptojnë sa e rëndësishme është të zbatohen menjëherë marrëveshjet” që synojnë rritjen e aftësive mbrojtëse të Ukrainës, duke përfshirë prodhimin e përbashkët të armëve, investimet në prodhimin e dronëve dhe furnizimin me sisteme të mbrojtjes ajrore.