Qëndresa Llugiqi është gazetare në mediumin e fuqishëm zviceran “Blick”.

Ky medium të premten ka vënë në ballinë një shkrim të Llugiqit lidhur me standardet e dyfishta në Zvicër, kur bëhet fjalë për shqiptarët që jetojnë në këtë shtet.

Ajo e ka nisur shkrimin duke prezantuar një email që mori. Në letër, “një zviceran i vërtetë” u ankua pse Llugiqi iu referua një personi të akuzuar për rënie nga një ballkon në Kosovë si shtetas zviceran. Sipas autorit të letrës, i akuzuari është “Papierli-Schweizer”, që ka kuptimin “zviceran me letra”.

Autori i letrës njëjtë e sheh edhe gazetaren, që veten e quan zvicerane me prejardhje kosovare.

Sipas gazetares Llugiqi, edhe në komentet e shumta në shkrimin në “Blick” nuk kishte të bënte shumë me aktin sa kishte të bënte me origjinën e autorit të krimit.

Në qëndrimin e saj, gazetarja e “Blick” ka përmendur edhe futbollistët, raporton Koha.net, transmeton KFVA.

“Nëse Riola Xhemaili shënon gol, ajo është zvicerane, zvicerane e mirë. Njëjtë nëse Shqipe Sylejmani publikon njërin prej librave të shkëlqyer të saj. Atëherë njerëzit nga komuniteti janë të mirëseardhur. Është mirë që ne zvicerano-kosovarët jemi këtu, jemi të mirë për diversitetin kulturor të Zvicrës. Por kur Granit Xhaka, Xherdan Shaqiri dhe të tjerët shfaqin shqiponjën dykrenare, përballemi me breshëri kritikash. Njerëzit si ne duhet t’i mbledhin valixhet – menjëherë”, ka shkruar Llugiqi.

“Shpejt ata ndahen. Zviceranët papritmas bëhen ‘eidgenossen’ nga njëra ana dhe ‘Papierli-Schweizer’ nga ana tjetër”.

Llugiqi shkruan se ky debat shpesh bëhet shumë emocional. Ajo thotë se në shumicën e kohës “zviceranët e vërtetë” mendojnë se Xhaka, Shaqiri, Xhemaili dhe të tjerët nuk janë “zviceranë të vërtetë”.

Gazetarja e “Blick” ka shkruar se derisa “zviceranët e vërtetë” e shohin vetëm “zvicerane në letër”, disa zvicerano-kosovarë nuk e shohin atë si të integruar, por si të asimiluar.

Ka paraqitur edhe problemet që i hasin në Kosovë.

“Kur zvicerano-kosovarët udhëtojnë në Kosovë, ne jemi ‘shacit’, një aludim përçmues ndaj fjalës gjermane ‘Schatz’. Nëse një zvicerano-kosovar vendos të mos luajë për Kosovën, ai është tradhtar. Riola Xhemaili e ka përjetuar vet këtë. Ajo fyhet nga vendi i lindjes së prindërve të saj për shkak të vendimit të saj, dhe nga homologët e saj zviceranë sepse emri i saj nuk është mjaftueshëm zviceran”, ka shkruar Llugiqi.

Ajo thotë se në komunitetin zvicerano-kosovar është quajtur tradhtare pasi ka shkruar për akte dhune që përfshijnë zvicerano-shqiptarët. Thotë se ka pranuar edhe kërcënime për shkak të raportimit që bën.

Tregon se si zvicerano-kosovarët i janë drejtuar edhe babait të saj “për ta mbajtur në kontroll, përndryshe do të ndodh diçka”.

Por ajo e ka përkrahjen e plotë të babait.

“Ti ja del, ti e din qysh të kemi rritur. A je Qëndresa?!”, i drejtohet ai.

Llugiqi thotë se për shkak të prejardhjes edhe aftësitë si gazetare i kontestohen. Ndien se edhe emri i paraqet pengesë.

Por Llugiqi thekson se prejardhja e saj edhe i ndihmon në punën si gazetare. Zvicerano-kosovarët e njohin personalisht dhe i besojnë.