kfvanews
Dogana e Kosovës ka njoftuar sot se Njësitë Antikontrabandë kanë zbuluar dhe parandaluar një rast kontrabande me mallra të dyshuara si të falsifikuara në Pikën Kufitare të Vërmicës, duke rezultuar me arrestimin e një oficeri doganor dhe një transportuesi mallrash.
Sipas komunikatës për media të Doganës, gjatë një operacioni të planifikuar është identifikuar një tentim për të futur në Kosovë mbathje sportive me marka të mbrojtura, pa kaluar kontrollin doganor dhe duke shmangur pagesën e detyrimeve.
“Hetuesit e Doganës, në bashkëpunim me Prokurorinë kompetente, kanë ndërmarrë të gjitha veprimet e nevojshme hetimore. Nga hetimet janë siguruar prova të mjaftueshme që dëshmojnë se zyrtari doganor nuk ka përmbushur detyrat ligjore duke mundësuar hyrjen e mallrave të kontrabanduara,” thuhet në njoftim.
Me urdhër të Prokurorit të Shtetit, janë ndaluar për 48 orë: Zyrtari doganor për veprën penale “Keqpërdorim i detyrës zyrtare”; Vozitësi i automjetit transportues për veprat penale “Kontrabandim i mallrave” dhe “Shmangie nga pagesa e detyrimeve doganore”.
Dogana e Kosovës ka theksuar se mbetet e përkushtuar në luftën kundër kontrabandës dhe mbrojtjen e tregut të brendshëm, duke ndjekur penalisht çdo rast të abuzimit me detyrë dhe veprimtarive të paligjshme që dëmtojnë ekonominë e vendit.
