Rregullatori i aviacionit në Indi u ka urdhëruar linjave ajrore që operojnë me aeroplanë Boeing të inspektojnë të gjithë çelësat e kontrollit të karburantit, disa ditë pasi një hetim për rrëzimin e avionit të Air India muajin e kaluar zbuloi se ato ishin fikur, duke i lënë të dy motorët pa karburant.

Drejtoria e Përgjithshme e Aviacionit Civil të Indisë deklaroi se direktiva do të zbatohej për Boeing 787 Dreamliner dhe disa variante të Boeing 737, dhe se linjat ajrore duhet të përfundojnë inspektimet dhe t’ia paraqesin gjetjet e tyre rregullatorit deri të hënën e ardhshme.

Një raport paraprak mbi rrëzimin e avionit të Air India që vrau 260 persona në qytetin veriperëndimor të Ahmedabadit, zbuloi se çelësat u zhvendosën brenda një sekonde, duke ndërprerë furnizimin me karburant për të dy motorët.

Raporti, i publikuar javën e kaluar, nuk ofroi asnjë përfundim në lidhje me shkakun e rrëzimit të avionit. Gjithashtu, nuk tha se si çelësat mund të kenë kaluar nga pozicioni i funksionimit në atë të ndërprerjes gjatë fluturimit.

Lëvizja e çelësave të kontrollit të karburantit lejon dhe ndërpret rrjedhën e karburantit në motorët e aeroplanit.

Boeing 787-8 Dreamliner u rrëzua më 12 qershor menjëherë pas ngritjes. Të gjithë nga 242 personat në bord, përveç njërit, humbën jetën, si dhe 19 persona në tokë.

Raporti, i lëshuar nga Byroja e Hetimit të Aksidenteve të Avionëve, vuri në dukje një këshillë të vitit 2018 nga Administrata Federale e Aviacionit të SHBA-së, e cila rekomandonte që linjat ajrore që operojnë modele Boeing të inspektojnë funksionin e kyçjes së çelësave të ndërprerjes së karburantit.

Sipas raportit, regjistrimet zanore në kabinën e pilotit kapën një moment konfuzioni midis pilotëve, ku njëri e pyeste tjetrin pse e kishte ndërprerë karburantin.

“Piloti tjetër u përgjigj se nuk e bëri këtë”, thuhet në raport.

Disa ekspertë të aviacionit në Indi spekuluan se rrëzimi u shkaktua nga një gabim njerëzor, bazuar në raportin paraprak. Të paktën dy shoqata pilotësh komercialë i kanë hedhur poshtë pretendime të tilla.

Shoqata Indiane e Pilotëve Komercialë në një deklaratë të dielën tha se ishte “thellësisht e shqetësuar nga narrativat spekulative… veçanërisht aludimet e pamatura dhe të pabaza për vetëvrasje të pilotëve”.

Të hënën, drejtori ekzekutiv i Air India, Campbell Wilson, tha se raporti paraprak mbi rrëzimin e aeroplanit me destinacion Londrën, nuk gjeti probleme mekanike ose mirëmbajtjeje me aeroplanin ose motorët e tij.

Në një memo të brendshme drejtuar stafit të linjës ajrore të parë nga AP, Wilson deklaroi se raporti tregonte se të gjitha detyrat e detyrueshme të mirëmbajtjes për avionin ishin përfunduar.

“Nuk kishte asnjë problem me cilësinë e karburantit dhe asnjë anomali me rrotullimin e ngritjes. Pilotët e kishin kaluar alkotestin e detyrueshëm para fluturimit dhe nuk kishte vërejtje në lidhje me gjendjen e tyre mjekësore”, tha ai në shënim.

Pas rrëzimit, autoritetet indiane urdhëruan një ekzaminim të plotë të të gjithë avionëve Boeing 787 Dreamliner të Air India për të parandaluar incidente të ardhshme. Air India ka 33 avionë të këtij modeli në flotën e saj