Në një ceremoni të veçantë të organizuar nga Ambasada e Kosovës në SHBA, Presidentja e Republikës së Kosovës, Vjosa Osmani, ka nderuar me Medaljen e Nderit “Hasan Prishtina” një ndër figurat më të angazhuara të diasporës shqiptare, Tahir Kukaj nga Drenica.

I pranishëm në listën e liderëve shqiptarë-amerikanë që u dekoruan për kontributin e tyre të jashtëzakonshëm, Kukaj u vlerësua për punën e palodhur në promovimin e kulturës shqiptare dhe ruajtjen e identitetit kombëtar dhe fetar në SHBA, nëpërmjet Qendrës Islame Kulturore Shqiptare (AICC), ku ai shërben me përkushtim të lartë.

Në një letër mirënjohjeje të publikuar në rrjetin e tij social, Kukaj e quajti këtë dekoratë një moment “thellësisht të përulur dhe të paharrueshëm” në jetën e tij. Ai e pranoi medaljen me krenari dhe përulësi, duke e cilësuar jo vetëm si arritje personale, por si dëshmi e punës kolektive dhe sakrificës së komunitetit që përfaqëson.

“Ky vlerësim nderon jo vetëm kontributin tim modest, por edhe përpjekjet e një komuniteti të tërë që ruan dhe kultivon trashëgiminë shqiptare dhe besimin islam në diasporë,” shkroi Kukaj.

Në veçanti, ai falënderoi Presidenten Osmani për udhëheqjen e saj inspiruese dhe përkushtimin ndaj vlerave të lirisë, identitetit dhe krenarisë kulturore.

Tahir Kukaj ndau mirënjohje të thellë për familjen e tij, si dhe për dy bashkëpunëtorët më të afërt: Dr. Dhulkarneijn Vardari, President i AICC, dhe Imam Prof. Ferid Bedrolli, Sekretar i AICC – të cilët ai i konsideron shtylla të rëndësishme të misionit të përbashkët.

Dekorimi i Tahir Kukajt nga Presidentja Osmani përforcon lidhjen mes institucioneve të Kosovës dhe diasporës, duke e vendosur në qendër rolin kyç që shqiptarët jashtë vendit vazhdojnë të luajnë në ruajtjen dhe promovimin e identitetit kombëtar.