Sot në Prishtinë u zhvillua një takim që pritet të sjellë një ndikim të drejtpërdrejtë në jetën e nxënësve – dhe shumë shpejt. Aktivisti dhe ligjëruesi i njohur kundër bullizmit, Labinot Azemi, u prit nga Drejtori i Arsimit në Komunën e Prishtinës, Samir Shahini, në një takim të hapur, të sinqertë dhe thellësisht frymëzues.
Me përkushtimin që e karakterizon, Labinoti ndau vizionin e tij për krijimin e një klime të sigurt e mirëkuptuese në shkolla, përmes ligjëratave që synojnë parandalimin e bullizmit dhe fuqizimin emocional të nxënësve. Në anën tjetër, Drejtori Shahini dëshmoi se është i hapur për bashkëpunime me vlerë, duke e parë arsimin jo vetëm si institucion, por si zemrën e shoqërisë.
“Nuk besoj në rastësi. Disa takime ndodhin në kohën e duhur, me njerëzit e duhur,” u shpreh Labinoti. “Ky ishte njëri prej tyre. Dhe besoj fuqishëm se nga ky bashkëbisedim do të lindë diçka që do ta ndiejë secili nxënës i Prishtinës – shumë shpejt.”
Nga ky bashkëpunim pritet të nisin projekte konkrete që do të prekin drejtpërdrejt shkollat e Prishtinës, me theks te ndërgjegjësimi, edukimi emocional dhe ndërtimi i një kulture të respektit.
Prishtina është gati. Diçka shumë e mirë po vjen. Dhe po vjen shumë shpejt.