Në natën e 7 korrikut një ngjarje e rëndë ndodhi në qytetin e Lipjanit, ku 27-vjeçari Agon Zejnullahu ka humbur jetën pas një ndërhyrje nga ana e policisë.

Policia e Kosovës fillimisht kishte marrë një informacion se një person i dehur po sulmonte vetura e qytetarë në rrugë.

Me të arritur në vendin e ngjarjes, kishte filluar përpjekja e tyre për ta vënë nën kontroll 27-vjeçarin.

Ajo që në fillim dihej ishte se ai kishte ndërruar jetë pas arrestimit.

Megjithatë, pamjet e publikuara dje në media zbuluan se të paktën pesë policë, derisa po tentonin ta vënin nën kontroll, kishin përdorur dhunë. Për cka, shtoi dyshimet për arsyet e vdekjes.

Menjëherë pas ngjarjes, Inspektorati Policor i Kosovës (IPK) nisi hetimet dhe rekomandoi suspendimin e pesë zyrtarëve policorë të përfshirë në rast. Zyrtarët për të cilët është rekomanduar masa e suspendimit përfshijnë një rreshter dhe katër policë patrullues.

Të njëjtit më vonë me urdhër të Prokurorisë Themelore në Prishtinë janë arrestuar dhe ndaj të njëjtave është caktuar masa e ndalimit 48-orësh, ndërsa hetimet po zhvillohen për veprën penale “vrasje nga pakujdesia”.

Ibrahim Nela, rreshter në Stacionin Policor Lipjan, Liridon Rrahmani, Artidon Konxheli dhe Albian Raktoceri, zyrtarë policorë të këtij stacioni, si dhe Endrit Beqiri, zyrtar në Stacionin Policor Ferizaj, rrezikojnë paraburgimin.

Nëse do të hetohen për këtë vepër, të dyshuarit mund të dënohen deri në 5 vjet.

Kështu ka deklaruar për Periskopin, avokati, Valdet Hoxha.