Një përmbytje katastrofike ka goditur Teksasin Qendror më 4 korrik, duke shkaktuar 24 viktima dhe duke lënë shumë persona të zhdukur, përfshirë pjesëmarrës të një kampi veror për vajza. Ngjarja ka tronditur opinionin publik amerikan dhe ka mobilizuar forca të shumta shpëtimi në terren, raporton BBC, përcjell KFVA.

Sipas autoriteteve të qarkut Kerr, rreth 6 deri në 10 inç shi (150–250 mm) ranë brenda disa orëve në zonën përreth qyteteve Hunt dhe Ingram, duke shkaktuar rritje të menjëhershme të nivelit të lumit Guadalupe.

Në një nga pikat më kritike, lumi u ngrit me rreth 22 këmbë (6.7 metra) për vetëm 2 orë, ndërsa në një tjetër vend, uji u rrit me 26 këmbë (7.9 metra) për 45 minuta – një ritëm jashtëzakonisht i rrezikshëm që nuk linte kohë për evakuim.

Ekipet e shpëtimit kanë qenë në veprim të vazhdueshëm për të kërkuar persona të bllokuar ose të zhdukur. Zyrtarët thanë se përmbytja ndodhi gjatë natës, çka e bëri edhe më të rrezikshme situatën, pasi shumë njerëz ishin në gjumë.

Guvernatori i Teksasit, Greg Abbott, shprehu ngushëllimet e tij për viktimat dhe urdhëroi shpalljen e gjendjes së jashtëzakonshme për zonën e prekur.