Një përmbytje shkatërruese ka goditur qytetet e vogla Kerrville dhe Hunt në Teksas, pasi lumi Guadalupe doli nga shtrati duke marrë me vete shtëpi, automjete dhe zona të tëra banimi. Të paktën gjashtë persona kanë humbur jetën, ndërsa qindra të tjerë janë detyruar të braktisin shtëpitë e tyre, shkruan KFVA.

Lumi u fry në mënyrë të menjëhershme pas një shiu të dendur prej gati 25 centimetrash gjatë natës, duke arritur një lartësi prej 10.3 metra, niveli i dytë më i lartë i regjistruar ndonjëherë. Shërbimi Kombëtar i Motit shpalli emergjencë përmbytjeje në të gjithë qarkun dhe rajonin përreth.

Një familje prej katër anëtarësh është raportuar e zhdukur pasi shtëpia e tyre në Kerrville u mor nga vërshimet. Po ashtu, një park me karavanë në zonën Ingram u përfshi plotësisht nga uji, ndërkohë që banorët ndodheshin ende brenda.

Shumë rrugë janë bërë të pakalueshme, ndërsa uji ka mbuluar edhe kalimet e ulëta. Qyteti Kerrville ka shpallur gjendjen e jashtëzakonshme, ndërsa një qendër bashkimi për banorët e prekur është ngritur në parkingun e një supermarketi lokal.

Një avari madhore në rrjetin elektrik ka lënë më shumë se 2600 familje pa energji elektrike në Kerrville, Center Point dhe Hunt. Ekipet e shpëtimit dhe shërbimet emergjente po punojnë në kushte ekstreme për të ndihmuar të prekurit.

Autoritetet i bën thirrje banorëve të mos udhëtojnë dhe të kërkojnë menjëherë strehim në zona më të larta, pasi përmbytjet konsiderohen potencialisht fatale. Emergjenca do të qëndrojë në fuqi deri të paktën në orën 14:00 me orën lokale të së premtes.