Presidenti rus Vladimir Putin foli në telefon me Presidentin francez Emmanuel Macron të martën, për herë të parë që kur Rusia pushtoi Ukrainën në vitin 2022.

Sipas mediave të huaja, Macron ishte një nga bashkëbiseduesit e rregullt të Putinit para shpërthimit të luftës.

Shumica e udhëheqësve perëndimorë i kanë ndërprerë lidhjet me Vladimir Putinin që nga fillimi i pushtimit të Ukrainës. Në nëntor 2024, Vladimir Putin shprehu keqardhje që udhëheqësit perëndimorë “ndaluan së telefonuari”.

Ai shtoi: “Nëse ndonjëri prej tyre dëshiron të rifillojë kontaktet, unë gjithmonë e kam thënë dhe dua ta përsëris: nuk kemi asgjë kundër tyre”.

Pala franceze foli për “mbështetjen e plotë të Francës për sovranitetin dhe integritetin territorial të Ukrainës”.

Macron madje bëri thirrje që “një armëpushim të hyjë në fuqi sa më shpejt të jetë e mundur dhe që të fillojnë negociatat midis Ukrainës dhe Rusisë për një zgjidhje të qëndrueshme të konfliktit”, tha presidenca franceze në një njoftim për shtyp, shkruan KFVA.

Pala ruse flet për një “diskutim thelbësor” dhe shton se të dy udhëheqësit diskutuan për Iranin dhe Izraelin, sulmet e SHBA-së ndaj objekteve bërthamore iraniane, si dhe për çështjen ukrainase, me Kremlinin që theksoi se lufta është rezultat i politikës perëndimore.

“Putini kujtoi se konflikti ukrainas është një pasojë e drejtpërdrejtë e politikave të shteteve perëndimore, të cilat për shumë vite injoruan interesat e sigurisë së Rusisë, krijuan një bazë anti-ruse në Ukrainë dhe toleruan shkeljet e të drejtave të banorëve rusishtfolës”, raporton Kremlini.

Vendet perëndimore, siç shtoi presidenti rus, po ndjekin një politikë që zgjat luftën dhe “furnizon regjimin e Kievit me armë moderne”.

Ai theksoi gjithashtu se zgjidhja në Ukrainë duhet të jetë gjithëpërfshirëse, të eliminojë shkaqet rrënjësore dhe të bazohet në realitetet në terren.

Përveç kësaj, udhëheqësi rus “konfirmoi qasjet themelore ndaj marrëveshjeve të mundshme, të cilat duhet të jenë gjithëpërfshirëse dhe afatgjata, të parashikojnë eliminimin e shkaqeve rrënjësore të krizës ukrainase dhe të bazohen në realitete të reja territoriale”.

Presidentët diskutuan gjithashtu situatën në Lindjen e Mesme në kontekstin e konfliktit Iran-Izrael dhe sulmeve të SHBA-së ndaj objekteve iraniane, raporton Kremlini, shkruan A2 CNN.

Ata vunë në dukje rëndësinë e respektimit të së drejtës së Iranit për përdorimin paqësor të energjisë bërthamore dhe përmbushjen e detyrimeve të tij sipas Traktatit për Mospërhapjen e Armëve Bërthamore, duke përfshirë bashkëpunimin me IAEA-në.

Të dy presidentët mbështetën zgjidhjen e krizës mbi Iranin dhe konflikteve të tjera në rajon përmes diplomacisë. Ata ranë dakord të vazhdojnë kontaktet me qëllim koordinimin e mundshëm të qëndrimeve mbi zgjidhjen e krizës së Lindjes së Mesme dhe gjithashtu vunë në dukje përgjegjësinë e veçantë të Rusisë dhe Francës si anëtarë të përhershëm të Këshillit të Sigurimit të OKB-së për ruajtjen e paqes dhe sigurisë.

Ata më në fund ranë dakord të vazhdojnë kontaktet me njëri-tjetrin me qëllim koordinimin e mundshëm të qëndrimeve.