Aktivisti dhe ligjëruesi i njohur kundër bullizmit, Labinot Azemi, ka përmbyllur me sukses projektin “Lufta kundër bullizmit në shkollat e Ferizajt”, një nismë që nuk matet me statistika, por me jetë të prekura dhe ndërgjegje të zgjuara.

Në një takim zyrtar me Kryetarin e Komunës së Ferizajt, Agim Aliu, Labinoti u prit me respekt dhe mirënjohje publike për punën dhe përkushtimin e tij, duke theksuar se ky projekt nuk kishte asnjë interes personal, përveç thirrjes shpirtërore për të ndihmuar të rinjtë.

“Këtu nuk jam thjesht emër. Këtu jam djalë i kësaj toke që flet për dhimbjen dhe për shpresën, pa filtra”, u shpreh Azemi, duke falënderuar institucionet lokale që e mbështetën pa asnjë hezitim.

Kryetari Aliu, drejtori i arsimit Afrim Llabjani, shefi i kabinetit Albion A. Sherifi dhe psikologu i projektit Orhan Nazifi ishin pjesë kyçe e këtij rrugëtimi, duke e kthyer bashkëpunimin në një model institucional dhe njerëzor.

Labinoti ka qenë zëri i të rinjve në shumë qytete, por Ferizaji, siç e thekson vetë ai, i ka dhënë çelësin për të hapur zemra dhe mendje. “Ky projekt u mbyll, por misioni jo”, përfundoi ai me një zotim të qartë për të mos ndalur kurrë luftën kundër bullizmit.

Ferizaji, sërish u bë qyteti që dëgjoi, përqafoi dhe veproi. Dhe Labinot Azemi, emri që e bën ndryshimin..KFVA/