Deputeti i Kuvendit të Kosovës, Veton Berisha, ka denoncuar në polici një incident të ndodhur pas një takimi zyrtar në Qeveri, ku sipas tij është sulmuar, ofenduar dhe kërcënuar nga një anëtar i kryesisë së partisë së ministrit Elbert Krasniqi.

Përmes një deklarate publike, Berisha ka bërë të ditur se pas përfundimit të takimit dhe fjalimit të tij të mbajtur në prani të kryeministrit, ai është përballur me Fazli Stollajn – anëtar i kryesisë së Iniciativës së Re Demokratike të Kosovës.

“Me keqardhje më duhet të ndaj me ju një ngjarje e padëshirueshme. Ju njoftoj që dje, pas takimit në Qeveri dhe pas fjalimit tim që e kam publikuar – e që të gjithë e keni parë – në dalje nga ai takim jam sulmuar, ofenduar dhe kërcënuar nga Fazli Stollaj, anëtar i kryesisë së Iniciativës së Re Demokratike të Kosovës,” ka deklaruar Berisha.

Sipas deputetit, ai është sulmuar pasi gjatë takimit ka theksuar mungesën e emblemës së komunitetit egjiptian dhe ka përmendur edhe autorin e saj, Fazli Stollajn. Sipas Berishës, kjo ka nxitur reagimin e Stollajt, i cili më pas e ka sulmuar.

“Kam përmendur mungesën e emblemës së komunitetit egjiptian dhe kam cituar autorin – Fazli Stollaj. Kjo duket se e ka shqetësuar atë dhe menjëherë pas takimit ka kërkuar përballje me mua, duke më thënë të mos ia përmend emrin më,” ka shtuar Berisha.

Deputeti thotë se Stollaj e ka kërcënuar me fjalët “do t’i qerojmë hesapet ndryshe” dhe më pas e ka shtyrë, shoqëruar me ofendime të rënda verbale.

Berisha konfirmon se rasti është denoncuar zyrtarisht në polici dhe se pret që institucionet të veprojnë sipas ligjit.