Gjatë javës së kaluar, Presidenti i Shteteve të Bashkuara Donald Trump ka lëshuar deklarata mbi Iranin që duken kontradiktore.

Ai ka bërë thirrje për përfundimin e luftës dhe ka lënë të kuptohet se paqja do të vijë “së shpejti”, vetëm për të sugjeruar më pas se vrasja e udhëheqësit suprem iranian Ali Khamenei mund të jetë një mundësi për SHBA-në, së bashku me bashkimin me fushatën e bombardimeve të Izraelit.

Në kthesën e fundit, Shtëpia e Bardhë tha të enjten se Trump do të marrë një vendim nëse do t’i bashkohet luftës brenda dy javësh.

Këto ndryshime në qëndrimin e presidentit i kanë bërë disa vëzhgues të mendojnë se Trump mund të mos ketë një strategji apo qëllim të qartë; përkundrazi, ai po tërhiqet në luftë nga kryeministri izraelit Benjamin Netanyahu, i cili ka kërkuar sulme amerikane ndaj Iranit për dekada të tëra.

Nga ana tjetër, a mund ta përdorë Trump retorikën e tij gjithnjë e më luftarake kundër Iranit për ta detyruar Teheranin të bjerë dakord të heqë dorë plotësisht nga programi i tij bërthamor?

Nëse është kështu, ekspertët paralajmërojnë se loja me zjarrin mund të shndërrohet në një luftë të përgjithshme midis SHBA-së dhe Iranit.

Jamal Abdi, president i Këshillit Kombëtar Iraniano-Amerikan, tha se Trump mund të jetë duke u përpjekur të ndërtojë ndikim me kërcënime, për ta detyruar Iranin të pranojë kërkesat e tij për “dorëzimin total”.

“Mendoj se ai po përpiqet ta paraqesë veten si ky i çmendur që është i paparashikueshëm, dhe duke vepruar kështu, ai mund të këmbëngulë në këtë linjë shumë të ashpë,r që Irani ka refuzuar ta pranojë për dekada të tëra të çmontimit të plotë të programit të tij të pasurimit”, tha Abdi për Al Jazeera.

Një tjetër shpjegim i mundshëm i deklaratave të fundit të Trump, shtoi Abdi, është se ai “po mashtrohet nga Bibi Netanyahu për t’i angazhuar Shtetet e Bashkuara në një luftë të plotë me Iranin”.