Donald Trump ka njoftuar se marrëveshja tregtare e SHBA-së me Kinën “është arritur”, pas bisedimeve në Londër këtë javë. Ai shpjegon se SHBA-të do të kenë qasje në mineralet e rralla të tokës kineze dhe magnetet, për të cilat zyrtarët e tij kishin kërkuar.

Në një postim në faqen e tij Truth Social, Trump gjithashtu deklaron se marrëdhënia me Kinën është “e shkëlqyer”.

Kujtojmë se më parë ai kishte thënë se negociatat me Pekinin “nuk ishin të lehta”.

“Marrëveshja jonë me Kinën është e përfunduar dhe është subjekt i miratimit përfundimtar mes presidentit Xi (Jinping) dhe meje.

“Magnetet dhe çdo metal i rrallë i nevojshëm do të furnizohet paraprakisht nga Kina. Po kështu, ne do t’i ofrojmë Kinës atë që është rënë dakord, duke përfshirë studentët kinezë që përdorin kolegjet dhe universitetet tona (gjë që gjithmonë më ka pëlqyer!)”.

Më parë, SHBA-të dhe Kina thanë se kishin rënë dakord në parim për një kornizë për uljen e tensioneve tregtare midis dy ekonomive më të mëdha në botë.

Muajin e kaluar, Uashingtoni dhe Pekini ranë dakord për “një armëpushim të përkohshëm” mbi tarifat tregtare, por që atëherë secili vend ka akuzuar tjetrin për shkelje të marrëveshjes.

Marrëveshja i nënshtrohet miratimit përfundimtar nga ai vetë dhe Presidenti i Kinës Xi Jinping, tha presidenti i SHBA-së, duke shtuar se synon të punojë ngushtë me Xi për të hapur Kinën ndaj tregtisë amerikane, duke e përshkruar perspektivën si “një FITORE të madhe për të dy vendet!!!”.

Përfaqësuesit nga të dyja palët zbuluan të martën se ishte arritur një marrëveshje mbi tregtinë pas një dite të dytë bisedimesh të nivelit të lartë në Londër.

“Ne kemi arritur një kornizë për të zbatuar konsensusin e Gjenevës dhe thirrjen midis dy presidentëve”, u tha gazetarëve Sekretari i Tregtisë i SHBA-së, Howard Lutnick.