Ngrënia e rregullt e bukës së bardhë të paketuar mund të rrisë rrezikun e vdekjes nga kanceri i zorrës së trashë me më shumë se një të tretën, ka sugjeruar një studim i ri.

---

Konsumi i shpeshtë i proshutës, bacon-it dhe pijeve të ëmbla sjell të njëjtin rrezik të rritur për vdekje nga kanceri, zbuluan studiuesit amerikanë.

Ndërkohë, ngrënia e shumë perimeve ‘të verdha të errëta’ si patatet e ëmbla dhe karotat, si dhe pirja e kafesë, mund të ofrojë njëfarë mbrojtjeje.

Në 30 vitet e fundit, diagnozat e hershme të kësaj sëmundjeje janë rritur me 80 për qind në mbarë botën, tregojnë kërkimet.

Shkencëtarët kanë sugjeruar një sërë faktorësh të mundshëm që qëndrojnë pas këtij fenomeni – nga ndotja e shtuar deri te obeziteti në rritje dhe madje grimcat e padukshme të plastikës në ujin e pijshëm.

Tani, specialistë amerikanë kanë zbuluar prova se ngrënia e një diete ‘të lartë inflamatore’ mund të jetë një shkaktar i ‘anashkaluar’.

Ushqimet që bien nën këtë kategori përfshijnë mishrat e përpunuar si bacon-i, proshuta dhe sallamet, pijet e ëmbla, karbohidratet e rafinuara si pasta dhe buka e bardhë, si dhe organet e brendshme.

Megjithatë, perimet e verdha të errëta si patatet e ëmbla dhe karotat, si dhe kafeja, vera dhe, në mënyrë befasuese, pica, të gjitha klasifikohen si ‘ushqime anti-inflamatore’ sipas modelit empirik të dietës inflamatore (EDIP) – një mjet global që vlerëson ushqimet sipas ‘potencialit të tyre inflamator’.

Pica klasifikohet si anti-inflamatore pasi përmban domate të gatuara, të pasura me antioksidantin e fuqishëm, likopen.

Studimi zbuloi se pacientët me kancer të zorrës së trashë që konsumonin më shumë ushqime inflamatore se 80 për qind e pjesëmarrësve kishin 36 për qind më shumë rrezik për të vdekur nga kanceri krahasuar me ata që hanin shumë pak nga këto ushqime.

Ekspertët, duke paraqitur gjetjet në konferencën e Shoqatës Amerikane të Onkologjisë Klinike (ASCO) në Çikago, thanë se, edhe pse ende nuk ka prova të mjaftueshme për të rekomanduar një dietë anti-inflamatore për pacientët me kancer, kjo mund të ndodhë së shpejti.

Në studim, shkencëtarët ndoqën 1,625 pacientë me kancer të zorrës së trashë që ishte përhapur në gjëndrat limfatike përreth, por jo më tej.

Të gjithë pjesëmarrësit plotësuan pyetësorë për ushqimet që konsumonin, të ndara në 18 grupe ushqimore – nëntë pro-inflamatore dhe nëntë anti-inflamatore.

Pas tre vitesh ndjekjeje, studiuesit gjetën se pacientët që kishin dietën më inflamatore (20 për qind më të lartë) kishin 36 për qind më shumë rrezik vdekjeje nga kanceri krahasuar me ata me dietën më pak inflamatore.

Gjithashtu, ata me dietën më inflamatore kishin 87 për qind më shumë rrezik të vdekjes nga çdo shkak krahasuar me grupin me dietën më të shëndetshme.

Kur u mor parasysh edhe aktiviteti fizik, ata që kishin dietën më pak inflamatore dhe bënin më shumë aktivitet fizik kishin 63 për qind më pak rrezik vdekjeje.