Një komision i burgjeve në Kaliforni ka rekomanduar që Patricia Krenwinkel, e cila po vuan një dënim të përjetshëm për rolin e saj në masakrën e vitit 1969 në Los Angeles, e kryer nga ndjekësit e udhëheqësit të kultit “Charles Manson”, të lirohet me kusht.

Bordi Shtetëror i Dëgjimeve për Lirim me Kusht vlerësoi se Krenwinkel, 77 vjeç – gruaja me dënimin më të gjatë në burgjet e Kalifornisë – përbën rrezik të vogël për të kryer krime të tjera, bazuar në moshën e saj dhe sjelljen e përkryer gjatë kohës së qëndrimit në burg, sipas KFMP-TV, degë lokale e CBS News në San Diego.

Departamenti Shtetëror për Korrektim dhe Rehabilitim konfirmoi vendimin për përshtatshmërinë për lirim me kusht, i cili u dha gjatë seancës së saj të 16-të për këtë çështje, por nuk dha detaje të mëtejshme. Vendimi i së premtes përbën një propozim që i nënshtrohet rishikimit nga i gjithë Bordi Shtetëror i Lirimit me Kusht dhe nga guvernatori i Kalifornisë për një periudhë deri në 150 ditë përpara se të bëhet përfundimtar.

Edhe nëse bordi i plotë e konfirmon përshtatshmërinë për lirim me kusht, guvernatori Gavin Newsom mund ta rrëzojë vendimin ose ta kthejë për rishikim të mëtejshëm, raporton theguardian.

Një rekomandim i mëparshëm për lirimin e Krenwinkel nga një panel i bordit në maj 2022 ishte refuzuar nga Newsom në gusht të atij viti. Krenwinkel, e cila ndodhet në Institucionin për Gratë në Kaliforni, mori pjesë në seancën katërorëshe të së premtes me avokatin e saj, por nuk iu drejtua komisionerëve, sipas KFMP. Disa anëtarë të familjeve të viktimave folën kundër lirimit të saj.

Krenwinkel u dënua në vitin 1971 me shtatë akuza për vrasje të shkallës së parë për pjesëmarrjen në një sulm të përgjakshëm dyditor, viktimat e të cilit përfshinin aktoren Sharon Tate, bashkëshorten 26-vjeçare të regjisorit Roman Polanski, transmeton Telegrafi.

Tate, në muajin e tetë të shtatzënisë në atë kohë, u vra bashkë me katër miq, mes tyre trashëgimtarja e pasurisë së kafes Abigail Folger dhe stilisti i flokëve Jay Sebring, në shtëpinë me qira në kodrat e Benedict Canyon në Los Angeles, të cilën ajo dhe Polanski e ndanin. Polanski ndodhej në Evropë në atë kohë.

Natën pasardhëse, pronari i një dyqani ushqimor, Leno LaBianca, dhe bashkëshortja e tij, Rosemary, u therën për vdekje në shtëpinë e tyre, ku fjalët “Vdekje derrave” dhe “Healter Skelter” – një referencë e shkruar gabim për këngën e Beatles Helter Skelter – u gjetën të shkruara me gjakun e viktimave në vendin e krimit.

Charles Manson nuk vrau personalisht asnjërën nga shtatë viktimat, por u shpall fajtor për urdhërimin e vrasjeve si pjesë e një komploti delirant për të nxitur një luftë racore.

Ai, Patricia Krenwinkel dhe anëtarë të tjerë të ashtuquajturës “familje” të tij të përbërë nga hipi, të rinj të arratisur dhe të përjashtuar nga shoqëria – përfshirë Leslie Van Houten, Susan Atkins dhe “Tex” Watson – fillimisht u dënuan me vdekje. Dënimet e tyre u shndërruan në burgim të përjetshëm pasi Gjykata e Lartë e Kalifornisë e shfuqizoi dënimin me vdekje në vitin 1972.

Manson vdiq në burg në vitin 2017 në moshën 83-vjeçare.

Van Houten u lirua me kusht nga burgu në vitin 2023, pas 53 vitesh të kaluara pas hekurave. Guvernatori Newsom kishte refuzuar rekomandimin për lirimin e saj, por një gjykatë apeli në Kaliforni e rrëzoi vendimin e tij.

Guvernatori kishte mundësi të kërkonte nga Gjykata e Lartë e shtetit rishikimin e çështjes, por zgjodhi të mos e bënte, duke vlerësuar se përpjekjet e mëtejshme për ta mbajtur Van Houten në burg kishin pak gjasa të kishin sukses. /KFVA/