Sipas një deklarate nga presidenca turke, Erdogan deklaroi se Turqia po bën përpjekje aktive për një paqe të drejtë dhe të qëndrueshme midis Ukrainës dhe Rusisë dhe shprehu kënaqësinë e tij me rezultatet pozitive të bisedimeve të mbajtura në Stamboll më 16 maj dhe përfundimin e shkëmbimit të të burgosurve në një periudhë të shkurtër kohore.

Presidenti turk tha gjithashtu se një vendim i mundshëm për armëpushim në raundin e dytë të planifikuar të bisedimeve do të ishte një hap i rëndësishëm drejt paqes. Qëllimi, tha ai, është të ruhet momenti i arritur në procesin e negociatave duke siguruar pjesëmarrje të fortë të delegacioneve.

Së fundmi, Recep Tayyip Erdogan theksoi se një takim i udhëheqësve pas bisedimeve të delegacionit do të kontribuonte në procesin e paqes dhe deklaroi se këto bisedime duhet të mbahen pa vonesë.

Sot përfundoi vizita dy-ditore në Ukrainë e Ministrit të Jashtëm turk, Hakan Fidan, pas një vizite të ngjashme që ai bëri në Moskë, me fokus kryesor në përpjekjet për paqe në luftën ukrainase.

Ministri turk, përveç konsultimeve me homologun e tij Andriy Sibiha, pati takime edhe me presidentin ukrainas Volodymyr Zelensky dhe Ministrin e Mbrojtjes Rustem Umerov, i cili kryesoi delegacionin ukrainas në Stamboll.

Të mërkurën, Ministri i Jashtëm rus, Sergei Lavrov kishte deklaruar se Moska propozon të rifillojë bisedimet më 2 qershor, përsëri në Stamboll.