kfvanews
Danella Arsovska kundër Visar Ganiut është një përballje ku urbanizmi i paligjshëm takohet me agresivitetin politik. Asgjë nuk e përfaqëson kaosin politik më mirë se kundërpërgjigja e Ganiut, kryetarit të komuns Çair që shmang akuzat për korrupsion, me kamionë të plehrave.
Arsovska, e armatosur me dokumente dhe akuza, shpall me zë të lartë se Ganiu ka kthyer Çairin në një kantier ndërtimi pa rregulla, duke lejuar ndërtimin e mbi 150 ndërtesave të paligjshme në tokë të uzurpuar. Një klasik e korrupsionit, kriminalitet I përmasave të mëdha, ku ligjet trajtohen si letër e pavlerë, shkelmohen dhe flaken, ndërkohë që betonizimi vazhdon.
Danella për dy ditë rradhazi vjen në Çair e kërkon debat, kërkon përgjegjësi, kërkon të paktën një sqarim. Por Visar nuk paraqitet. Asnjëherë. Dy herë radhazi. Sepse përballja me skandalin kushton, ndërsa heshtja është falas. Madje Danella Arsovska e pagëzon Visarin me emrin “Princesha e Ndërtimeve të Paligjshme”, një pseudonim që do të mbetet gjatë në historinë e kaosit urban të Shkupit. Kur një kryetare bashkie e vë në lëvizje gjithë aparatin e saj për të denoncuar një skandal të përmasave kriminale, do të pritej një përballje. Por jo, sepse Visar Ganiu zgjedh strategjinë më të vjetër në manualin e politikës ballkanike: ikja, heshtja, shmangia.
Dhe kur qyteti është i zhytur në skandal, e rrezikon të ardhmen politike të Visarit dhe partisë, kundërpërgjigja dhe defokusimi i opinjonit janë plehrat. Shumë plehra. Një hakmarrje groteske, në mes të natës, ku Visari mbledh mbeturinat e Çairit dhe i dërgon në zyrat e Qytetit të Shkupit.
Një manovër spektakolare, një manifestim politik që vjen me aromë të rëndë, por nuk mbulon faktin se ndërtimet e paligjshme nuk mund të shpëlahen me mbeturina.
Analizë për Kosova Free Voice Agency- KFVA, nën autorësinë e ekspertit të politikës dhe marrëdhënieve ndërkombëtare nga Maqedonia e Veriut, G.A.
