by kfvanews
Share
by kfvanews
Share
Reforma e sistemit tatimor në Amerikë, e propozuar nga presidenti i SHBA-së, Donald Trump, ka shumë kundërshtarë mes anëtarëve të Partisë Demokratike, por si kritik i veçuar është shfaqur edhe Elon Musk, miliarderi dhe një nga bashkëpunëtorët më të afërt të tij.
Në një video të publikuar në rrjetin e tij social, X, Musk shprehu keqardhje për ligjin që tashmë është miratuar nga shumica republikane në Dhomën e Përfaqësuesve të Kongresit amerikan, pas presionit nga Shtëpia e Bardhë.
“Isha i zhgënjyer kur pashë ligjin gjigant të shpenzimeve, sinqerisht, i cili rrit deficitin buxhetor dhe jo e ul atë, dhe që minon punën që po bën ekipi DOGE (Departamenti joformal për efikasitetin e qeverisë). Mendoj se një ligj mund të jetë i madh ose i bukur, por nuk e di nëse mund të jetë të dyja njëkohësisht”, tha miliarderi.
Ligji “i madh dhe i bukur” i Trumpit përfshin triliona dollarë në ulje taksash dhe një rritje të madhe të shpenzimeve për ushtrinë amerikane dhe sigurinë kombëtare – që financohen kryesisht përmes reformave në programet federale të kujdesit shëndetësor dhe ushqimit, si dhe shkurtimeve në programet për energjinë.
Zyra jopartiake e Buxhetit të Kongresit vlerëson se ky ligj do ta rrisë më tej deficitin me 3.8 trilionë dollarë. Ligji u miratua ngushtë në Dhomën e Përfaqësuesve javën e kaluar dhe tani shkon në Senat, ku pritet t’i nënshtrohet ndryshimeve të shumta.
Duhet theksuar se kohët e fundit Musk është tërhequr nga angazhimet me qeverinë me kohë të plotë për t’u përqendruar te kompanitë e tij, përfshirë SpaceX dhe Tesla, të cilat pjesërisht kanë hasur vështirësi për shkak të lidhjes së Musk me administratën Trump.
Ai e komentoi këtë vendim në një intervistë për Ars Technica.
“Mendoj se ndoshta kam kaluar pak më shumë kohë me politikën – më pak sesa mendojnë njerëzit, sepse mediat gjithmonë do të theksojnë çdo temë politike, pasi debatet politike tërheqin shumë vëmendje”, tha ai kur u pyet nëse mendonte që përqendrimi i tij në politikë gjatë vitit të kaluar i ka “dëmtuar” SpaceX-it.
Musk gjithashtu deklaroi se në të ardhmen do të shpenzojë “shumë më pak” para për politikën, por ende nuk është e qartë nëse këto deklarata nënkuptojnë edhe një ndryshim në premtimin e tij për të investuar 100 milionë dollarë në grupet politike të kontrolluara nga Trump.
Grupet e lidhura me Musk gjithashtu kishin shpenzuar më shumë se 20 milionë dollarë në zgjedhjet për gjyqtarin e Gjykatës Supreme të Wisconsin-it më herët këtë vit, në të cilat kandidati i tij përfundimisht humbi.
Megjithatë, vlen të theksohet se Musk vazhdon të mbrojë publikisht departamentin e tij joformal, dhe CNN më herët ka raportuar se DOGE do të vazhdojë punën pa praninë e Musk.
Ka dështuar për herë të 32-të konstituimi i Kuvendit të Kosovës. Përveç VV-së, partitë tjera politike nuk propozuan anëtarë për Komisionin për Votim të fshehtë. Në sallë ishin të pranishëm 75 deputetë. Vetëm 45 deputetë votuan për, kundër 1 dhe abstenim s’kishte. Seanca e radhës do të jetë më 17 qershor. Vetëvendosje këmbëngul
Kryeministri britanik, Sir Keir Starmer, ka njoftuar se Mbretëria e Bashkuar po dërgon më shumë avionë luftarakë në Lindjen e Mesme, si përgjigje ndaj përshkallëzimit të përleshjeve mes Izraelit dhe Iranit. Avionët përfshijnë Typhoon si dhe aeroplanë për furnizim ajror, të cilët janë pjesë e mbështetjes emergjente për rajonin. Sir Keir tha se
Cepi juglindor i Evropës, përfshirë Kosovën, po shndërrohet në terrenin ku shtetet më të fuqishme përpiqen të zhvendosin një nga dilemat e tyre: çfarë të bëjnë me migrantët që nuk i duan brenda kufijve të vet? Së fundi, Kosova është pajtuar të strehojë 50 migrantë nga shtete të treta që qëndronin në SHBA,
Avokati Arianit Koci ka paralajmëruar se edhe sot do të protestojë para Kuvendit të Kosovës. Ai, përmes një postimi në Facebook, u bëri lutje qytetarëve që të bojkotojnë deputetët e zgjedhur. “E dimë paraprakisht: as sot, për të 32-tën herë, deputetët nuk do të merren vesh. Një tjetër ditë e humbur. Një tjetër
