Të paktën tetë persona janë vrarë dhe më shumë se 30 të tjerë janë plagosur në të gjithë Ukrainën në sulmet me dronë dhe raketa ruse gjatë natës (e diel 25 maj), thanë zyrtarët rajonalë. Katër vdekje u raportuan në rajonin perëndimor Khmelnytskyi të Ukrainës. Tre vdekje të tjera u raportuan në rajonin e Kievit dhe një në qytetin jugor të Mykolaiv.

Kjo vjen një ditë pasi Kievi pësoi një nga sulmet më të rënda që nga fillimi i pushtimit rus , me sulme ajrore ruse që vranë të paktën 13 persona.

Ministria e mbrojtjes e Rusisë tha se njësitë e saj të mbrojtjes ajrore rrëzuan ose interceptuan 95 dronë ukrainas mbi një numër rajonesh ruse, përfshirë Moskën, gjatë një periudhe katër-orëshe të shtunën në mbrëmje. Nuk u raportuan viktima.

Sulmi me dron detyroi një pezullim të shkurtër të të gjitha fluturimeve në aeroportet e Moskës.

Presidenti rus Vladimir Putin nisi një pushtim në shkallë të plotë të Ukrainës në shkurt të vitit 2022, dhe Moska aktualisht kontrollon rreth 20% të territorit ukrainas.

Këtu përfshihet edhe Krimea – gadishulli jugor i Ukrainës i aneksuar nga Rusia në vitin 2014.

Në një deklaratë në Facebook, kreu rajonal i Khmelnytskyit, Serhiy Tyurin, tha se katër persona u vranë dhe pesë të tjerë u plagosën në sulmet ruse.

“Gjashtë shtëpi private u shkatërruan dhe 20 të tjera u dëmtuan”, shtoi ai.

Kreu rajonal i Kievit, Mykola Kalashnyk, tha se tre persona u vranë dhe 10 të tjerë u plagosën.

Ai postoi në rrjetet sociale foto të disa shtëpive të djegura pas sulmeve ruse.

Në kryeqytetin Kiev, zyrtarët lokalë raportuan 11 të plagosur, zjarre të shumta dhe dëme në ndërtesa banimi, përfshirë një konvikt.

Qindra njerëz u panë të strehoheshin në stacionet nëntokësore të metrosë së qytetit. Kjo vjen ndërsa kryeqyteti shënon festën e tij vjetore të Ditës së Kievit të dielën.

Në Mykolaiv, shërbimi shtetëror i emergjencave të Ukrainës DSNS tha se trupi i një burri të moshuar u nxor nga një ndërtesë banimi pesëkatëshe e goditur nga një dron. Pesë persona të tjerë u plagosën.

Në Kharkiv, autoritetet rajonale raportuan tre të plagosur.

Në Rusi, ministria e mbrojtjes tha se dronët ukrainas shënjestruan tetë rajone ruse.

“Nga ora 20:00 sipas kohës së Moskës (17:00 GMT) më 24 maj deri në orën 00:00 të 25 majit, njësitë e mbrojtjes ajrore në detyrë shkatërruan dhe interceptuan 95 mjete ajrore pa pilot të tipit avion ukrainas”, tha ministria në një deklaratë.

Kryetari i bashkisë së Moskës, Sergei Sobyanin, raportoi se 12 dronë që po shkonin drejt kryeqytetit u rrëzuan.

Ai shtoi se ekipet e shërbimeve të emergjencës u vendosën për të vlerësuar dëmet e shkaktuara nga rënia e mbeturinave të droneve.

Në rajonin e Tulës, pak në jug të Moskës, mbetjet e dronit u rrëzuan në oborrin e një ndërtese banimi, duke thyer dritaret në një numër apartamentesh, tha guvernatori lokal Dmitriy Milyaev.

Askush nuk u lëndua, shtoi ai.

Sulmet ndodhën ndërsa Rusia dhe Ukraina marrin pjesë në shkëmbimin e të burgosurve të rënë dakord pas bisedimeve midis dy palëve në Turqi.

Të premten, Ukraina dhe Rusia dorëzuan secila nga 390 ushtarë dhe civilë në shkëmbimin më të madh të të burgosurve që kur Rusia nisi sulmin e saj në shkallë të plotë në shkurt 2022.

Të shtunën, Presidenti ukrainas Volodymyr Zelensky njoftoi se 307 të burgosur të tjerë ukrainas ishin kthyer në shtëpi si pjesë e një marrëveshjeje shkëmbimi me Kremlinin.

Të dy vendet kanë rënë dakord të shkëmbejnë gjithsej 1,000 të burgosur secila, dhe një shkëmbim tjetër pritet të ndodhë të dielën.

Shkëmbimi vjen pas bisedimeve të para ballë për ballë midis dy palëve në tre vjet, të cilat u zhvilluan në Turqi.

Më herët këtë javë, Presidenti i SHBA-së Donald Trump dhe Putin patën një telefonatë dy-orëshe për të diskutuar një marrëveshje armëpushimi në Ukrainë, të propozuar nga SHBA-të.

Trump tha se besonte që telefonata kishte shkuar “shumë mirë” dhe shtoi se Rusia dhe Ukraina do të “fillojnë menjëherë” negociatat drejt një armëpushimi dhe “përfundimit të luftës”.

Megjithatë, Putin ka thënë vetëm se Rusia do të punojë me Ukrainën për të hartuar një “memorandum” mbi një “paqe të mundshme në të ardhmen” dhe nuk ka pranuar një armëpushim 30-ditor.