Sipas mjekëve, vetëm njëri prej fëmijëve, së bashku me babain, kanë mbijetuar, megjithëse kanë pësuar plagë serioze. Djali 11-vjeçar i Dr. Alaa al-Najjar u operua nga kirurgu britanik Graeme Groom, i cili punon vullnetarisht në të njëjtin spital.

Pamje të shpërndara nga autoritetet lokale dhe të verifikuara nga BBC tregojnë momente të dhimbshme teksa trupat e fëmijëve nxirreshin nga rrënojat. Sipas Ministrisë së Shëndetësisë në Gaza, e drejtuar nga Hamasi, shtëpia u godit pak pasi bashkëshorti i mjekes, Hamdi al-Najjar, ishte kthyer në banesë, pasi kishte dërguar gruan në punë.

“Fëmija më i madh ishte vetëm 12 vjeç,” tha drejtori i ministrisë, Dr. Muneer Alboursh. “Një tragjedi e paimagjinueshme.”

Zëdhënësi i Mbrojtjes Civile, Mahmoud Basal, konfirmoi se ekipet kishin nxjerrë tetë trupa fillimisht dhe disa të plagosur nga rrënojat, por më pas bilanci i viktimave u përditësua në nëntë fëmijë të vrarë.

Në një deklaratë të përgjithshme, Forcat Mbrojtëse të Izraelit (IDF) thanë të shtunën se gjatë 24 orëve të fundit kishin goditur mbi 100 objektiva në të gjithë territorin e Gazës. Ndërkohë, Ministria e Shëndetësisë bëri me dije se të paktën 74 persona janë vrarë në këtë periudhë.

Dr. Youssef Abu al-Rish, një tjetër mjek në spitalin Nasser, tha se e kishte gjetur Dr. al-Najjar në sallën e operacionit, në pritje për lajme mbi gjendjen e djalit të saj, të vetmit nga fëmijët që i mbijetoi sulmit.

Në një deklaratë të dhimbshme, një i afërm i familjes, Youssef al-Najjar, i bëri thirrje komunitetit ndërkombëtar: “Mjaft! Kini mëshirë për ne! Jemi të rraskapitur nga zhvendosja dhe uria!”