kfvanews
Ministri palestinez i Shëndetësisë deklaroi të enjten se gjatë ditëve të fundit në Gaza kanë vdekur 29 fëmijë dhe persona të moshuar si pasojë e urisë, dhe mijëra të tjerë janë në rrezik.
“Gjatë ditëve të fundit kemi humbur 29 fëmijë”, u tha ai gazetarëve, duke i përshkruar këto si “vdekje të lidhura me urinë”.
Reuters raporton se ai më vonë sqaroi se numri total përfshin si të moshuar, ashtu edhe fëmijë.
Majed Abu Ramadan është ministër në Autoritetin Palestinez me qendër në Ramallah dhe nuk është pjesë e administratës shëndetësore që drejtohet nga Hamasi në vetë Gazën.
I pyetur për të komentuar mbi deklaratën e mëparshme të shefit të ndihmës së OKB-së për BBC-në se 14 mijë foshnja mund të vdesin pa ndihmë, ai tha se “shifra prej 14 mijë është shumë reale… ndoshta edhe e nënvlerësuar”.
Një përfaqësues i Shoqatës së Gjysmëhënës së Kuqe Palestineze deklaroi se sot në Gaza ende nuk është shpërndarë asnjë ndihmë. Shumica e kamionëve që pritej të hynin sot janë kontrolluar në pikëkalimin izraelit Kerem Shalom, por ende nuk e kanë kaluar kufirin.
Ushtria izraelite lëshoi të enjten një urdhër evakuimi për 14 vendbanime në pjesën veriore të Rripit të Gazës, përfshirë pjesë të Beit Lahisë dhe Jabalijes.
Sipas Agence France-Presse (AFP), ushtria izraelite në një deklaratë në gjuhën arabe tha se “po vepron me forcë intensive në zonat tuaja, ndërsa organizatat terroriste vazhdojnë aktivitetet dhe operacionet e tyre në rajonet e përmendura”
