Ish-ushtari i Ushtrisë Çlirimtare të Kosovës, Ridvan Tahiri, ka reaguar me tone të forta pas vizitës së analistit Nexhmedin Spahiu në Beograd, ku ky i fundit u takua me ministrin serb të Punëve të Jashtme, Marko Gjuriq, shkruan Gazeta KFVA.
Përmes një postimi, Tahiri deklaroi se Spahiu duhet të ishte marrë në pyetje nga prokuroria për takimin, duke e krahasuar me raste të tjera të ndaluarve për bashkëpunim me agjentë të shërbimit serb BIA.
“Z. Spahiu duhet ta dijë se është me fat që nuk jam unë në krye të organeve të sigurisë – përndryshe, do ta kishte pritur i njëjti fat në hyrje të Kosovës siç e pati miku i tij dikur,” tha Tahiri, duke theksuar se Spahiu është një qytetar i zakonshëm dhe se duhet të japë llogari për kontaktet e tij.
Reagimi i Tahirit vjen pas publikimit të lajmit për takimin e Spahiut me Gjuriqin, të cilin ky i fundit e prezantoi si një përpjekje për tejkalimin e tensioneve ndëretnike.