kfvanews
Një video po qarkullon gjerësisht në rrjetet sociale në Itali, ku shfaqet një tifoz i cili po bën një bisedë me presidentin e Lacios, Klaudio Lotito.
Një telefonatë ku drejtuesi i klubit italian nuk kursehet kundër futbollistëve të tij.
“Lojtarët kanë m** në tru, përndryshe nuk do bënin futbollistin. A ke parë ndonjëherë një lojtar inteligjent? Lojtarët ndahen në katër kategori: normal, të mirë, shumë të mirë dhe kampionë”, tha ai fillimisht.
Më pas ngacmohet për eliminimin e Lacios ndaj Bodo/Glimt dhe aty nuk përmbahet.
“Bodo është një skuadër të mbaruarish. Noslin na kushtoi 18 milionë, e donte trajneri, nuk e kërkova unë. Tani ai më tha “po çfarë i ka ndodhur, vitin e kaluar ishte fenomen””.
Tifozi më pas e pyet për Tçauna që kishte pëlqyer postimin e UEFA-s për kualifikimin e Bodo.
“Ai është me të vërtetë budalla, nuk di as italisht”, përgjigjet Lotito.
Video është shpërndarë me shpejtësi në rrjete sociale dhe ka shtyrë Lotiton të reagonte.
Ai ka shkuar në polici ku ka denoncuar atë që sipas tij është klonimi që dikush i ka bërë celularit të tij.
Sipas Lotitos, çdo gjë është një mashtrim.
Kësisoj, Lotito i ka kërkuar policisë të hetojë këtë ngjarje të rëndë e zbulojë autorët e krimit, si dhe të heqë videon nga rrjetet sociale, pasi e cilëson false dhe mashtrim.
