Arabia Saudite është e gatshme dhe e interesuar të presë një Kupë Bote me 64 skuadra në vitin 2034, nëse FIFA e miraton një propozim të diskutueshëm për ta zgjeruar turneun nga 48 ekipe, tha ministri i sportit i mbretërisë.

CONMEBOL-i i Amerikës së Jugut ka propozuar zyrtarisht që Kupa e Botës për 100-vjetorin në vitin 2030 të zhvillohet në Spanjë, Portugali dhe Marok, me 64 ekipe pjesëmarrëse – ide e cila është kundërshtuar nga disa konfederata të tjera kontinentale.

Turneu i ardhshëm, që do të mbahet në vitin 2026 në SHBA, Kanada dhe Meksikë, do të ketë 48 ekipe – një rritje krahasuar me 32 sa ishin në vitin 2022.

Princi Abdulaziz bin Turki Al-Faisal, duke folur për një grup të përzgjedhur gazetarësh gjatë garës së Formula 1 në Xheda, tha se vendi i tij nuk do të kishte asnjë kundërshtim ndaj rritjes së numrit të ekipeve për vitin 2034.

“Jemi gati, ose do të jemi gati, inshallah. Nëse ky është një vendim që FIFA e merr dhe e konsideron të drejtë për të gjithë, atëherë ne jemi më se të lumtur ta realizojmë,” tha ai.

Ai përmendi infrastrukturën tashmë ekzistuese për pelegrinët myslimanë, duke përmendur faktin që këtë Ramazan, katër milionë njerëz morën pjesë në Umre në Mekë, dhe pesë milionë priten për Haxhin.

FIFA e shpalli zyrtarisht Arabinë Saudite si organizatore të Kupës së Botës 2034 për meshkuj në dhjetor – një kandidaturë që nuk kishte konkurrencë.