kfvanews
Disa fotografi të reja satelitore e shfaqin atë që mund të jetë luftanija më e madhe ndonjëherë e Koresë së Veriut, me gjasë mbi dyfish më e madhe se secila anije tjetër në flotën e këtij shteti aziatik.
Në fotografitë e shkrepura më 6 prill nga kompanitë e pavarura satelitore, “Maxar Technologies” dhe “Planet Labs”, anija shihet në ndërtim e sipër në ujë në limanin Nampo, në bregdetin perëndimor të Koresë së Veriut, rreth 60 kilometra në jugperëndim të kryeqytetit Penjan, raporton televizioni CNN.
Analistët thonë se fotografitë e shfaqin ndërtimin e vazhdueshëm të armëve dhe sistemeve të tjera të brendshme të anijes, e cila me gjasë është një fregatë me raketa me drejtim (FFG), e dizajnuar për të bartur raketa në gypa vertikalë të hedhjes për përdorim kundër caqeve tokësore e detare.
“FFG-ja është përafërsisht 140 metra e gjatë, duke e bërë atë anijen më të madhe luftarake të prodhuar në Korenë e Veriut”, thuhet në një analizë nga Joseph Bermudez Jr. dhe Jennifer Jun në Qendrën për Studime Strategjike dhe Ndërkombëtare.
Ekzistenca e kësaj anije nuk është befasi. Regjimi i udhëheqësit Kim Jong Un është përfshirë në një modernizim të shpejtë të forcave të armatosura, duke zhvilluar një varg armësh të reja e duke testuar raketa balistike ndërkontinentale që mund të arrijnë pothuajse në secilën pjesë të Shteteve të Bashkuara, raporton televizioni amerikan.
Shteti i largët aziatik e ka bërë këtë pavarësisht nga sanksionet e vendosura nga Kombet e Bashkuara, të cilat kanë vënë kufizime të rrepta ndaj qasjes së Penjanit në materiale dhe teknologji që përdoren për zhvillimin e atyre armëve.
Sidoqoftë, lidhjet më të ngushta me Rusinë që nga fillimi i luftës në Ukrainë mund të jetë duke e ndihmuar Korenë e Veriut për t’i tejkaluar sanksionet e OKB-së, thonë analistët.
