Aeroplani i JD Vance u nis për në Grenlandë këtë mëngjes dhe  – siç raportohet nga mediat amerikane –ai u nis për atje bashkë me gruan e tij, Usha.

Po ashtu në aeroplan raportohet të jenë edhe:

Këshilltari i Sigurisë Kombëtare Mike Waltz me gruan e tij dhe ish-këshilltaren e Trumpit për sigurinë e vendit, Julia Nesheiwat

Sekretari i Energjisë Chris Wright

Senatori amerikan Mike Lee (i cili dukej se ishte shumë i emocionuar nga udhëtimi derisa publikoi edhe një foto të JD Vance në Grenlandë të krijuar përmes AI).

Kur JD Vance dhe delegacioni i tij të zbresin në bazën hapësinore Pituffik në Grenlandë të premten, ata do të përshëndeten me fjalët: “Mirë se erdhe në majën e botës”.

Megjithatë, pritje për të nuk do të ketë nga zyrtarët danezë.

Në kohë normale, një vizitë e një zëvendëspresidenti të SHBA-së do të kërkohej në mënyrë aktive nga shumë vende aleate si një shfaqje e dobishme e marrëdhënieve të ngushta me Uashingtonin.

Por këto ditë kanë ikur. Kur JD Vance zbret në bazën hapësinore Pituffik në Grenlandë pasdite, nuk do të ketë asnjë përfaqësues danez për ta mirëpritur atje dhe ata ishin të hapur për faktin se ai, në fakt, nuk është i mirëpritur atje, të paktën askund jashtë bazës amerikane.

Vizita në Pituffik, një bazë ushtarake e largët e mbyllur nga akulli në Grenlandën veriperëndimore, do të monitorohet nga afër nga udhëheqësit në Nuuk dhe Kopenhagë, të cilët kanë shprehur kundërshtimin e tyre ndaj udhëtimit mes kërcënimeve të vazhdueshme nga Donald Trump për të marrë Grenlandën, një territor gjysmë autonom i Danimarkës.

“Është e sigurt të thuhet se më mirë mos ta kishim atë [Vance] në Grenlandë”, tha një burim qeveritar në Kopenhagë.

Të enjten, kryeministrja daneze, Mette Frederiksen tha: “Grenlanda është pjesë e mbretërisë daneze. Kjo nuk do të ndryshojë”.

Ndërkohë Lars Løkke Rasmussen, ministri i Punëve të Jashtme i Danimarkës, tha se Vance nuk do të përshëndetet nga politikanët danezë në Pituffik sepse “nuk ka të bëjë fare me ne”.

“Kjo ka të bëjë me një zëvendës-president amerikan që do të vizitojë instalimin e tij ushtarak në Grenlandë. Nuk ka të bëjë fare me ne”, tha ai.