“Ka Asociacion”, thotë Kurti – referuar Marrëveshjes Bazike/Ohrit anipse s’ka ndërmarrë asnjë hap për ta jetësuar atë.

(Mos)qenësia e këtij obligimi, na fton ai të konsiderojmë, varet nga pakoja e përgjithshme e marrëveshjes.

Brenda saj po, jashtë saj jo.

Për draft-Statutin si të tillë, Kurti para kuvendit qe shprehur se është i shkruar “simbas germës, ndonëse jo sipas frymës, së Kushtetutës së Kosovës”.

Edhe si të tillë, qe ofruar ai, do ta pranonte “edhe me koston politike që vjen me të” para tre liderëve më të mëdhenj evropian: Scholz-it, Macron-it dhe Melon-it.

Por, sipas tij – me firmën bilaterale të Serbisë në një dokument totalizues.

Osmani, megjithatë, del të ketë lavjerrësinë e vet të pozicioneve: edhe/edhe, as/as.

Kishte shprehur brengat e veta karshi tekstit, dhe ftuar edhe opozitën që të ingranojë shqtësimet e tyre: LDK-ja i ishte përgjigjur, AAK gjithashtu, PDK-ja jo.

Osmani i këndonte një diskursi më realist: kryesisht kërkesave amerikane dhe domosdoshmërisë së qëndruarit në orbitën e mbështetjes dhe garancës amerikane.

Madje, shkaku i qëndrimeve më pragmatike të saj – ishte edhe kontakti amerikan kur Kurti ishte i palëkundur në raport me po atë marrëveshje.

Fast-forward nga fundi i mandatit të saj, oktavat i çoi më lart se Kurti.

Me të kryer vizitën e parë si emisar i BE-së për dialogun Kosovë – Serbi, Peter Sorensenit, Vjosa Osmani i paraqiti “vërejtjet” për draft-Statutin e Asociacionit.

Nga Qeveria e Kosovës as nuk e dhanë për përmbajtje të takimit çështjen e Asociacionit.

Për më tepër, sipas qeverisë, ky propozim përbën “jo-dokument” – dhe se rrjedhimisht, nuk kanë dhënë “vërejtje e komente, për diçka që s’kemi pranuar”.

Anomalia u shfaq haptazi për një dokument, gjithnjë sipas qeverisë, juridikisht jo-ekzistues që të jepen komente për të.

Por, Osmani po…

Dikur e amortizonte kritikën duke përdorur gjuhë angleze për të mos i rënë shkelm dokumentit, si shqetësime për “judicial review” – fjalën e kishte për arbitrazhin – tash Osmani rri e prerë se dokumenti është antikushtetues.

“Në detaje prezantuam vërejtjen tona sa i përket draft-Statutit të propozuar nga BE. Dhe, ky ishte takim më shumë ku u njoftua rreth qëndrimeve tona sesa që morëm qëdnrime nga ana e tij.

Po flasim për draft-Stautin, çështje që unë personalisht besoj që nuk janë në përputhje me Kushtetutën e Kosovës. Nuk janë në përputhje as me vlerat as me normat e BE-së, as me standardet e KiE-së pastaj. Dhe po ashtu nu kjanë në përputhje me aktvendimin e GjK-së së vitit 2015.

Statuti i tillë që bie në kundërshti me këto trija, nuk ka se si të hyjë në fuqi dhe as nuk besoj që do të mund të kalonte testin në GjK-së, e cila ka vendosur standardte në shumë nga këto tema brenda draft-Statutit. Siç janë kompetencat ekzekutive e shumë çështje tjera“, tha ajo, raporton Nacionale.

Ish-Kryetari i Gjykatës Kushtetuese, Enver Hasani, ditë më parë i tha Radios Evropa e Lirë, se draft-Statuti si i tillë është antikushtetues – por, se nuk ka gjasa të anulohet si obligim.

“Të gjitha këto janë në kundërshtim brutal me Kushtetutën e Kosovës. Por, draft-statuti [i Asociacionit] nuk mund të anulohet pa u anuluar dy marrëveshjet tjera [të Brukselit dhe Ohrit]. Kjo nuk mund të ndodhë”, thekson Hasani.